मोबाईल शाॅपीच्या आड गॅस रिफिलिंगचा अवैध धंदा उघडकीस!

नांदगाव पेठ पोलिसांची धाड – ४ लाखांचा मुद्देमाल जप्त

अमरावती: मोबाईल शाॅपीच्या नावाखाली सुरू असलेला अवैध गॅस रिफिलिंगचा धंदा अखेर पोलिसांच्या जाळ्यात अडकला. नांदगाव पेठ पोलिसांनी शुक्रवारी दुपारी तीनच्या सुमारास कारवाई करत तब्बल ४ लाख रुपयांचा मुद्देमाल जप्त केला.

ही धाड नांदगाव पेठ शासकीय वसाहत, गल्ली क्र. १ मधील ‘रोमाना मोबाईल शॉपी’ येथे टाकण्यात आली. येथे गॅस रिफिलिंगचे साहित्य, २३ भरलेले व ३५ रिकामे असे ५८ अवैध सिलेंडर, दोन इलेक्ट्रिक वजनकाटे आढळून आले. जप्त करण्यात आलेले सिलेंडर नांदगाव पेठ येथील अधिकृत गॅस एजन्सीकडे सुपूर्द करण्यात आले.

या प्रकरणी शाबीर लष्कर व एक महिला (दोघेही रा. शासकीय वसाहत, नांदगाव पेठ) यांच्याविरोधात जीवनाश्यक वस्तू अधिनियम १९५५ च्या कलम ३ व ७ अंतर्गत गुन्हा दाखल करण्यात आला आहे.

कारवाईदरम्यान ठाणेदार दिनेश दहातोंडे व पुरवठा विभागाच्या निरीक्षण अधिकारी चैताली यादव यांची विशेष भूमिका राहिली.