पंतप्रधान मोदी यांच्या मातोश्रींचा अपमान : अमरावतीत भाजपचे आंदोलन

अमरावती : पंतप्रधान नरेंद्र मोदी आणि त्यांच्या दिवंगत मातोश्री हीराबेन मोदी यांच्यावर आधारित कृत्रिम बुद्धिमत्तेच्या (AI) माध्यमातून तयार केलेल्या व्हिडिओच्या निषेधार्थ आज अमरावतीत भाजपने तीव्र आंदोलन केले.

भाजपने काँग्रेस खासदार राहुल गांधी यांच्यावरही मर्यादा ओलांडल्याचा आरोप करत त्यांच्या निषेधाच्या घोषणा या वेळी देण्यात आल्या. हा व्हिडिओ बिहार काँग्रेसने दोन दिवसांपूर्वी एक्सवर पोस्ट केला होता. व्हिडिओमध्ये पंतप्रधान मोदींच्या आई स्वप्नात येऊन त्यांना राजकारणात अजून किती घसरणार? असा सवाल विचारण्यात आला.

भाजप महिला मोर्चाच्या प्रदेशाध्यक्ष आमदार चित्रा वाघ यांच्या सूचनेनुसार आणि भाजपचे अमरावती शहर जिल्हाध्यक्ष डॉ. नितीन धांडे यांच्या मार्गदर्शनाखाली हे आंदोलन झाले. महिला मोर्चाच्या अध्यक्ष सुधा तिवारी यांनी या आंदोलनाचे नेतृत्व केले. या वेळी मोठ्या संख्येने भाजपचे पदाधिकारी व कार्यकर्ते उपस्थित होते.

भाजप पदाधिकाऱ्यांच्या म्हणण्यानुसार, पंतप्रधानांच्या दिवंगत मातोश्रींचा हा अपमान केवळ त्यांच्या व्यक्तीचा नाही तर देशातील प्रत्येक आई, बहीण आणि मुलीचा अपमान आहे. त्यांनी सांगितले की, काँग्रेस आणि मित्रपक्षांनी अनेकदा महिलांचा अपमान केला असून, देशाच्या सर्वोच्च पदावर असलेल्या व्यक्तीच्या दिवंगत आईबद्दल असे वक्तव्य करणे त्यांच्या विकृत मानसिकतेचे उदाहरण आहे.

भाजप आणि महिला मोर्चा हे कृत्य कधीही सहन करणार नाही, असा संदेश या आंदोलनातून देण्यात आला. या वेळी जयंत डेहनकर, शिवराय कुलकर्णी, बादल कुलकर्णी, ललित समदूरकर, राधा कुरील, ॲड. प्रशांत देशपांडे, गंगा खारकर, सुरेखा लुंगारे, लता देशमुख, शीतल वाघमारे, जया माहोरे यांच्यासह अनेक पदाधिकारी व कार्यकर्ते उपस्थित होते.