₹18.81 कोटी थकबाकीमुळे कंत्राटदारांचा संताप; अमरावतीत बेमुदत ठिय्या आंदोलन सुरू

महाराष्ट्र जीवन प्राधिकरणाच्या जलव्यवस्थापन विभागाकडून प्रलंबित देयकांच्या मुद्द्यावरून कंत्राटदारांनी अखेर आंदोलनाचा मार्ग स्वीकारला आहे. अमरावती जिल्हा जीवन प्राधिकरण कंत्राटदार असोसिएशनने 6 मे 2026 पासून विभागाच्या कार्यालयासमोर बेमुदत ठिय्या आंदोलन सुरू केले आहे.
असोसिएशनच्या माहितीनुसार, सन 2024-25 मधील ₹3.50 कोटी आणि 2025-26 मधील ₹15.31 कोटी अशी एकूण ₹18.81 कोटींची देयके अद्यापही अदा करण्यात आलेली नाहीत. या संदर्भात अनेकदा पाठपुरावा करूनही आणि मुंबईतील मध्यवर्ती कार्यालयाकडून वारंवार आश्वासने मिळूनही प्रत्यक्ष निधी वितरित न झाल्याने कंत्राटदारांमध्ये नाराजी वाढली आहे.
यापूर्वी कंत्राटदारांनी 1 एप्रिलपासून पाणीपुरवठा कामे थांबवण्याचा इशारा दिला होता. मात्र प्रशासनाच्या आश्वासनानंतर तो निर्णय मागे घेण्यात आला होता. त्यानंतरही परिस्थितीत कोणताही बदल न झाल्याने आता थेट आंदोलनाचा मार्ग अवलंबण्यात आला आहे.
कंत्राटदारांचे म्हणणे आहे की, थकबाकीमुळे त्यांची आर्थिक स्थिती गंभीर बनली असून कामे सुरू ठेवणे कठीण झाले आहे. त्यामुळे देयके तातडीने न दिल्यास आंदोलन अधिक तीव्र करण्याचा इशाराही देण्यात आला आहे.
या आंदोलनाची माहिती संबंधित वरिष्ठ अधिकारी, जिल्हाधिकारी आणि इतर प्रशासकीय यंत्रणांना देण्यात आली असून, या प्रकरणात प्रशासनाची भूमिका काय राहणार याकडे सर्वांचे लक्ष लागले आहे.