केदारनाथ यात्रेवर नैसर्गिक आपत्ती, भूस्खलनामुळे रस्ता बंद, शेकडो भाविक अडकले

उत्तराखंडमधील रुद्रप्रयाग जिल्ह्यात नैसर्गिक आपत्तीमुळे केदारनाथ यात्रेवर हजारो भाविक अडकले आहेत. पवित्र तीर्थयात्रेच्या मार्गावर भूस्खलन आणि दगड कोसळल्याने गौरीकुंड ते केदारनाथ हा पदपथ तात्पुरता बंद करण्याचा निर्णय घेण्यात आला आहे. त्यामुळे शेकडो भाविक अडकले आहेत. पाऊस आणि ढगफुटीमुळे हा परिसर संवेदनशील बनला आहे.
प्रशासनाने दिलेल्या माहितीनुसार, रामबाडा आणि जंगलछट्टी दरम्यानचा मार्ग भूस्खलनामुळे उद्ध्वस्त झाला आहे. येथील डोंगरांवरून माती आणि दगड सतत कोसळत आहेत. यामुळे या मार्गाचे पूर्णपणे नुकसान झाले आहे. भाविकांच्या सुरक्षिततेचा विचार करून, सध्या केदारनाथ यात्रा थांबवण्याचा निर्णय घेण्यात आला आहे.

केदारनाथ यात्रेला जाणाऱ्या भाविकांना सुरक्षित ठिकाणी थांबवण्यात आले आहे. प्रशासनाकडून युद्धपातळीवर बचाव आणि मदतकार्य सुरू करण्यात आले आहे. महत्त्वाच्या ठिकाणी एसडीआरएफ आणि पोलिस पथके तैनात करण्यात आली आहेत. हवामान खात्याने पुढील ४८ तासांत मुसळधार पावसाचा अंदाज वर्तवला असल्याने परिस्थिती आणखी बिकट होऊ शकते असे म्हटले जात आहे.
केदारनाथ यात्रेला जाणाऱ्या भाविकांना घाबरू नका आणि प्रशासनाच्या सूचनांचे पालन करण्याचे आवाहन करण्यात आले आहे. भाविकांच्या सुरक्षिततेसाठी प्रशासनाने गौरीकुंड आणि सोनप्रयाग येथे भाविकांना थांबवले आहे.

प्रतिकूल हवामान परिस्थिती
केदारनाथ यात्रेला दरवर्षी लाखो भाविक येतात. तथापि, डोंगराळ प्रदेशात प्रतिकूल हवामान परिस्थितीमुळे यात्रेवर नेहमीच परिणाम होतो. स्थानिक प्रशासन आणि राज्य सरकार परिस्थितीवर लक्ष ठेवून आहे आणि रस्ते मोकळे झाल्यानंतर यात्रा पुन्हा सुरू होईल असे सांगण्यात आले आहे.