प्रियांका चोप्राच्या कुटुंबावर शोककळा; बहीण मन्नाराच्या वडिलांचं निधन

अभिनेत्री प्रियांका चोप्रा आणि परिणिती चोप्रा यांची चुलत बहीण मन्नारा चोप्राच्या वडिलांचं निधन झालं आहे. 16 जून रोजी त्यांनी अखेरचा श्वास घेतला. ते 72 वर्षांचे होते. मन्नारा चोप्राचे वडील रमन राय हांडा हे गेल्या काही दिवसांपासून आजारी होते. ते दिल्ली उच्च न्यायालयात वकील होते. मन्नाराने सोशल मीडियावर पोस्ट लिहित वडिलांच्या निधनानंतर भावना व्यक्त केल्या आहेत. रमन हांडा हे प्रियांका आणि परिणिती चोप्रा यांचे काका होते. मन्नाराने तिच्या इन्स्टाग्राम अकाऊंटवर पोस्ट लिहित वडिलांच्या पार्थिवावरील अंत्यसंस्काराची माहिती दिली आहे.

मन्नाराची पोस्ट-

‘अत्यंत दु:खाने आणि वेदनेने आम्ही आमच्या प्रिय वडिलांच्या निधनाची माहिती देत आहोत. ते 16 जून 2025 रोजी आम्हाला सोडून गेलेय. ते आमच्या कुटुंबासाठी शक्तीचा आधारस्तंभ होते’, अशा शब्दांत मन्नाराने दु:ख व्यक्त केलं. रमन हांडा यांच्या पार्थिवावर 18 जून रोजी दुपारी 1 वाजता मुंबईतील अंधेरी पश्चिम इथल्या स्मशानभूमीत अंत्यसंस्कार होतील, अशीही माहिती तिने दिली. रमन राय हांडा यांच्या पश्चात त्यांची पत्नी कामिनी चोप्रा हांडा आणि मुली मन्नारा, मिताली असा परिवार आहे.

रमन हांडा यांचं लग्न प्रियांका आणि परिणिती चोप्राची मावशी कामिनी चोप्रा यांच्याशी झालं होतं. त्यामुळे रमन हांडा हे प्रियांका आणि परिणितीचे काका होते. मन्नारा ही दोन्ही अभिनेत्रींच्या मावशीची मुलगी आहे. या नात्याने ती त्यांची चुलत बहीण आहे.

मन्नारा चोप्राने ‘जिद’ या चित्रपटातून बॉलिवूडमधल्या तिच्या कारकिर्दीची सुरुवात केली. परंतु हा चित्रपट बॉक्स ऑफिसवर यशस्वी ठरला नव्हता. त्यानंतर ती दाक्षिणात्य चित्रपटसृष्टीकडे वळली. मन्नाराने तिथे ‘थिका’, ‘दुश्त’ आणि ‘सीता’ यांसारख्या चित्रपटांमध्ये काम केलं. परंतु तिथेही विशेष ओळख न मिळाल्यामुळे अखेर मन्नाराने सलमान खानच्या ‘बिग बॉस 17’ या शोची ऑफर स्वीकारली. या शोमुळे तिला चांगलीच प्रसिद्धी मिळाली होती. ती हा शो जिंकू शकली नव्हती, परंतु या शोमुळे ती बरीच लोकप्रिय झाली. नंतर तिने ‘लाफ्टर शेफ्स- अनलिमिटेड एंटरटेन्मेंट सिझन 2’मध्येही भाग घेतला. मन्नारा शेवटची 2024 मध्ये प्रदर्शित झालेल्या ‘थिरगबदरा सामी’ या तेलुगू चित्रपटात दिसली होती. यामध्ये तिने राज तरुण आणि मालवी मल्होत्रा यांच्यासोबत काम केलं होतं. याशिवाय मन्नारा काही पंजाबी चित्रपटांमध्येही झळकली.