तू मला आवडतेस " एका नदीच्या बाजूला नेऊन केले दुष्कर्म ; आश्रमशाळेतील विद्यार्थिनी गर्भवती !

अमरावती: वरुड तालुक्यातील एका आश्रमशाळेत शिक्षण घेणाऱ्या १५ वर्षे ९ महिने वयाच्या विद्यार्थिनीला गर्भधारणा झाल्याचा धक्कादायक प्रकार उघडकीस आला आहे. या प्रकरणी वरुड पोलिसांनी आरोपी राहुल रामुजी युवनाते (वय २७, रा. तिवसा घाट, ता. वरुड) याच्याविरुद्ध दुष्कर्म आणि पॉक्सो कायद्यांतर्गत गुन्हा दाखल केला आहे. ११ सप्टेंबर २०२५ रोजी रात्री ११:२५ वाजता आरोपीला अटक करण्यात आली.

हा प्रकार १ मे ते २५ जून २०२५ दरम्यान घडला. पीडित मुलगी वरुड येथील एका आश्रमशाळेत राहून शिक्षण घेते आणि उन्हाळी सुट्टीदरम्यान ती आपल्या आईकडे आली होती. २५ जून रोजी ती आपल्या आजोबांचा डबा घेऊन शेतात गेली होती. परत येताना आरोपी राहुलने तिला अडवले आणि "तू मला आवडतेस" असे म्हणत शरीरसंबंधाची मागणी केली. त्याने तिला जबरदस्तीने एका नदीकाठी नेले आणि तिच्यावर शारीरिक अत्याचार केला. याबाबत कुणाला सांगितल्यास जीवे मारण्याची धमकीही दिली. भीतीमुळे मुलीने ही बाब पालकांना सांगितली नाही.

पोलिसांनी तातडीने कारवाई करत आरोपीला अटक केली असून, या प्रकरणाचा तपास सुरू आहे. हा प्रकार स्थानिक समुदायात संताप आणि चिंतेचा विषय ठरला आहे.