सकाळी फिरायला जाणाऱ्या विद्यार्थ्यांना ट्रकने धडक दिली, ४ विद्यार्थ्यांचा मृत्यू, मुख्यमंत्र्यांनी मदत जाहीर केली

आजची सकाळ गडचिरोलीतील लोकांसाठी खूप वेदनादायक होती. पहाटेच्या सुमारास गडचिरोलीतील कातली गावात एक भयानक अपघात घडला. एका भरधाव ट्रकने सकाळी फिरायला गेलेल्या सहा विद्यार्थ्यांना धडक दिली, ज्यामुळे हा भीषण अपघात झाला. यापैकी दोघांचा जागीच मृत्यू झाला. तर उपचारादरम्यान आणखी दोघांचा मृत्यू झाला. यामुळे या अपघातात दुर्दैवाने चार विद्यार्थ्यांचा मृत्यू झाला आहे. तर दोन विद्यार्थी गंभीर जखमी आहेत.
मिळालेल्या माहितीनुसार, पहाटेच्या वेळी कातली गावातील काही तरुण मॉर्निंग वॉकला जात होते. त्याच वेळी एका भरधाव ट्रकने त्यांना धडक दिली. ही धडक इतकी जोरदार होती की दोन विद्यार्थ्यांचा जागीच मृत्यू झाला, तर इतर चार जण गंभीर जखमी झाले. जखमींना तातडीने गडचिरोली येथील जिल्हा सामान्य रुग्णालयात दाखल करण्यात आले, परंतु उपचारादरम्यान आणखी दोन विद्यार्थ्यांचा मृत्यू झाला. उर्वरित दोन विद्यार्थ्यांची प्रकृती गंभीर असून त्यांच्यावर उपचार सुरू आहेत. अपघातानंतर ट्रक चालक घटनास्थळावरून पळून गेला.

या अपघातामुळे गावात शोककळा पसरली आहे. सध्या गडचिरोलीतील ग्रामस्थांनी यावर तीव्र संताप व्यक्त केला आहे. अपघाताच्या निषेधार्थ संतप्त ग्रामस्थांनी रस्ता रोखला आहे. गावकऱ्यांनी वेगाने गाडी चालवणाऱ्या आणि मद्यपान करणाऱ्या चालकांवर कडक कारवाई करण्याची मागणी केली आहे.

देवेंद्र फडणवीस काय म्हणाले?

राज्याचे मुख्यमंत्री आणि जिल्ह्याचे पालकमंत्री देवेंद्र फडणवीस यांनी या घटनेवर दुःख व्यक्त केले आणि मृतांना श्रद्धांजली वाहिली. त्यांनी मृतांच्या कुटुंबियांना प्रत्येकी ४ लाख रुपयांची आर्थिक मदत जाहीर केली आहे. त्यांनी असेही सांगितले की, गंभीर जखमी झालेल्या दोन्ही विद्यार्थ्यांना पुढील उपचारांसाठी हेलिकॉप्टरने नागपूरला हलवण्याची व्यवस्था करण्यात आली आहे आणि त्यांच्या उपचाराचा संपूर्ण खर्च राज्य सरकार करेल.

गडचिरोली जिल्ह्यातील आरमोरी-गडचिरोली महामार्गावर झालेल्या अपघातात ४ तरुणांचा मृत्यू झाल्याची घटना अत्यंत दुर्दैवी आणि वेदनादायक आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबियांच्या दुःखात आम्ही सहभागी आहोत. या घटनेत २ तरुण जखमी झाले असून त्यांच्यावर गडचिरोली जनरल हॉस्पिटलमध्ये उपचार सुरू आहेत. त्यांना नागपूरला पाठवण्यासाठी हेलिकॉप्टरची व्यवस्था करण्यात आली आहे आणि पुढील १ तासात त्यांना पुढील उपचारांसाठी नागपूरला हलवले जाईल. मृतांच्या कुटुंबियांना ४ लाख रुपयांची आर्थिक मदत दिली जाईल, तर जखमींच्या उपचाराचा संपूर्ण खर्च राज्य सरकार उचलेल, असे देवेंद्र फडणवीस म्हणाले.